«ΕΝΕΜΕΝΑ ΣΕΝ!!!»

Στους αδελφούς πόντιους της Σουηδίας.
Για την αναγνώριση της γενοκτονίας των
παππούδων μας, από την Βουλή των Σουηδών
στις 11 Μαρτίου, 2010

Αετοί, Δράκοι, Τραντέλλενοι
Διγενήδες Ακριτάδες,
Κομνηνών γαίμαν Άγιον
Βησσαρίωνες, Γαβράδες!

ΦΡΑΓΓΙΔΗΣ έτον Πρόεδρος
με κάμποσα παιδία,
τ’απάν αφκά εκλώσανε
όλεν την Σουηδία.

Ο ΣΤΑΦΥΛΙΔΗΣ καλατσεύ’
LINDE και MALM ακούνε,
οι Πόντιοι ακολουθούν
ζεμίαν ‘κι τερούνε.

ΠΑΠΑΔΟΠΟΥΛΟΝ διόρθωσεν
Το λάθος ντ’ εποίκεν,
Σουηδίαν έργωσεν
λιθάρ’ σo λιθάρ’ ‘κι εφήκεν.

Το δύο χιλιάδες έτονε
το δέκα την χρονίαν,
τρανόν χαπέρ επαίραμε
μακρά σην Σουηδίαν.

Έρθεν το μένεμαν γλυκύν
‘ς σα Έντεκα Μαρτίου,
Σουηδόν ανεγνώρισεν
Ποντίων μαρτυρίου.

Σουηδόν φιλέλληνας
λάτρης των Ελλήνων,
το πνεύμαν το Πανάρχαιον
οδήγανεν εκείνον.

Πολιτικήν ‘κι ετέρεσεν
νε κόστος υπελόϊσεν,
είπεν θ’εφτάγω το δίκαιον
Ο Θέον ντ’ ευλόησεν.

Ο Σουηδόν φιλέλληνας
εσέβαστεν την ζίπκαν,
ΓΕΝΟΚΤΟΝΙΑΝ είπεν εν’
οι τούρκ’ ατό ντ΄εποίκαν.

Ατός είπεν κι’ ελάλεσεν
με δυνατόν λαλίαν,
οι τούρκ εποίκαν έγκλημαν
τρανόν ΓΕΝΟΚΤΟΝΙΑΝ.

Αγώναν εδώκανε αψύν
απέ σην Σουηδίαν,
να δασκεύνε ολουνούς
ντο εν’ ΓΕΝΟΚΤΟΝΙΑΝ.

Τιμήν πρέπ’ ‘ς Σουηδούς
ντ’εποίκαν την ορθίαν,
ατό θα μεν’ μνημόσυνον
εις μνήμην αιωνίαν!

Καλώς και καλωσόρισες
καλώς κι’ απ’όθεν έρθες,
Χρόνια «ΕΝΕΜΕΝΑ ΣΕΝ»
κι’ εσύ ατώρα εφάνθες!

Πορτολόης, ο Σταματέτες
Βοστώνη, 11 Μαρτίου 2010